From: Scottish Faust - Poems and Ballads of Eldritch Lore by Tom Hubbard

Leith Walk Variation on R.L.S.

Fir Doogi Todd, native o Embro

Come jyne me whaur there’s fowk and roads foregaither:
A boulievard thrists doun towart the sea,
A vennel shauchles up as frae the pit.
They form a dyke that’s tapped wi airn railins
On aither side o the wedge atween the weys:
Twa o the spikes curve upwart ti ilk ither,
Crooned wi the ae lamp, forenent the howff.
Hit’s a single ee, thon lamp, that has seen double,
As it merks the meetin place o licht and mirk.


    Hereaboots it wis that men wad swey in chains,
    The maws fair gleg ti chow thaim ti their banes;
    Whaur a runkled wife telt the weird o a kintra-lad:
    – The shadda o the wuddy athort his pad.